「知道可以搬屋好開心，我哋好想有屬於自己嘅空間，可以擺自己鍾意嘅公仔裝飾吓間房。」束起一條長辮子、滿臉稚氣的九歲長女阿喬雀躍地表達對新屋的期望。然而，喬母阿芳依靠綜援金度日，生活捉襟見肘，正為一筆搬遷的租金及雜費按金發愁，實無力滿足三名年幼子女的願望。

「上樓見到新屋嘅環境比較靜，我哋好鍾意，攞咗鎖匙到𠵱家都十幾日，不過因為冇錢搬屋同埋鋪膠地板，地下全部都係紅毛泥凹凸不平，根本搬唔到入去住；啲細路開始大個，有時換衫冇間房始終都唔方便，其實我都好想間一間房畀佢哋，但係𠵱家連租金同埋水電按金都冇錢交，重邊度有錢間房吖！」三十五歲雙眼泛紅的阿芳向記者娓娓道出其搬屋的矛盾心情。

靠綜援金維生
曾任職文員的阿芳因與丈夫性格不合而仳離，現獨力養育三名分別六至九歲的孩子，生活無依，靠領取綜援金維生，扣除每月的伙食費用後，還要支付孩子的教育開支，經濟十分拮据。自從離婚後，多年來，她承受不少精神壓力，既操心孩子的學業成績，亦憂柴憂米，為此她需要定期約見精神科醫生及接受心理輔導，以穩定情緒。
「有時見到啲仔女唔聽話，我就會好𤷪𤺧同埋發脾氣，𠵱家每個月嘅開支都繃繃緊，佢哋着緊嘅衫褲大部份都係人哋畀嘅二手衣物，每逢假期我哋都係留喺屋企睇電視或者落去公園行，咁多年我都未試過帶啲細路搭車去九龍區逛街，始終周圍去車費都好貴，試過一次帶佢哋去麥當勞淨係買咗包薯條同埋每人一個漢堡包，連花十幾廿蚊去買一個套餐我都唔捨得。」她無奈地歎道。