葉麗儀（Frances）今日喺上環為5月6日舉行一連兩場嘅演唱會採排，今次係Frances同香港中樂團第三次合作，會同中西合璧嘅音樂元素，演唱會中會加入占士邦嘅歌曲、Frances嘅經典名曲《上海灘》當然都會出現，佢話：「我覺得可以嚐試，唱JamesBond嘅歌，文化嘅fusion。」

今次演唱會由閻惠昌老師擔任指揮，Frances仲話好慶幸有機會同閻老師合作，問到閻老師會唔會希望同女兒閻奕格合作，佢話：「以後有機會。」

今天是中國元宵節，Frances話老公唔會特別慶祝呢個節日，但就提到之前喺新加坡上節目時講到佢同老公最浪漫嘅時刻，Frances話：「係老公喺25周年時送咗25朶花，我仲嫌花會老死，點解唔送盆栽，我唔係一個浪漫嘅人。」