2014年國際足協金球獎將於明晚深夜揭曉，而喺頒獎禮即將舉行之際，一班皇家馬德里球星基斯坦奴朗拿度（C朗）嘅球迷，就將61個足球射向歐洲足協會長柏天尼巴黎嘅住所抗議。點解射61個足球？又點解射向柏天尼屋企呢？因為C朗喺2014年就係射入咗61球，而柏天尼就當然因為喺嚿年10月曾經講過，金球獎應該頒畀德國門將紐亞而得罪C朗球迷啦，結果搞到自己日前冇覺好瞓！

由網上片段所見，每個足球都mark晒冧把，仲寫明C朗入波嘅時間同對手係邊隊，都幾認真架。不過佢哋半夜三更踢咁多波去柏天尼屋企，梗係搞到警鐘大響啦，呢班球迷自然雞飛狗走，柏天尼都冇符！話時話，未公佈結果都咁搞，如果C朗真係輸咗，唔知呢班球迷又會搞邊科呢？

↓短片連結↓
http://bit.ly/1BUZaph