韓國綜藝節目《RunningMan》（RM）主持人李光洙所屬事務所向外澄清，表示李光洙並無Instagram帳號，目前只有用twitter同微博，希望粉絲唔好被呃。

上年10月，事務所曾公開表示坊間有好多假冒光洙嘅帳號，更表明光洙嘅twitter帳號係「masijacoke85」，而微博帳號係「(actorleekwangsoo)李光洙」。但最近instagram再次出現疑似係李光洙嘅帳號，更引起超高人氣，粉絲人數更高達40幾萬。

對此，事務所出面澄清：「最近有一個關於『李光洙的Instagram』嘅文字經常出現，發現係粉絲流傳出來嘅，有一位海外粉絲因為特別鍾意光洙而開通設一個有關粉絲日程嘅帳號，雖然好感激粉絲嘅心意，但李光洙真係從來都無開過任何instagram嘅帳號。」

另外，李光洙今日公開同《RM》其他主持人食飯嘅相，照片中所有人都對鏡頭露出笑容，氣氛融洽，粉絲紛紛留言表示好想參與聚會。而光洙嘅學生相近日亦於網上曝光。