習大大上個禮拜尾無視疫情膠嗌一句「復工」，香港之首777即時收到然後死跟，呢個星期二向唔同部門首長出內部通知，要求公務員準備全面復工，務求下星期一政府部門可逐步恢復服務，但公務員隨時冇得同基本防護裝備connect，日前仲有傳媒爆料，話777係帶頭反對政府向公務員提供口罩嗰個，仲形容「返工都要着衫」，咁口罩當然係由員工自備。

呢個消息出街後，八方聽聞好多公務員好嬲，首先政府作為僱主，應帶頭做良心僱主，遵守《職業安全及健康條例》，所以有責任喺工作地點為僱員提供安全同健康嘅保障，但𠵱家連一日一口罩都唔畀，連好多黃色小店老細不如，點叫人日後做良心僱主、遵守《職業安全及健康條例》呢？更令公務員火滾係，佢哋同市民一樣，個個要四圍撲口罩，當中真係有血有淚，但係777就用政府口罩，反過嚟反對向公務員提供口罩，仲加多句「返工都要着衫」，完全係何不食肉糜的態度，公務員又點會唔嬲？

咁究竟777自己有冇買口罩返工用？佢有冇講過「返工要着衫」？佢同特首辦仲有禮賓府用緊嘅口罩，究竟係自備定政府供應？八方向特首辦查詢，點知收到一大堆答非所問嘅長篇大論，包括重申政府會優先供應口罩畀醫護人員、前線提供必要同緊急服務，以及參與防疫抗疫工作嘅人員等等，總之就係唔肯講自己個口罩係咪自備。有心水清政圈好事之徒話，如果777有去撲口罩自用，仲唔大大聲講咩！使咁左閃右避？

李八方