楊采妮(Charlie)今日到中環出席護膚品活動，佢表示目前正於台灣拍電影，該片乃有動畫成份，係自己產後首齣電影，佢話自己喺宜蘭拍攝時好開心。提到台灣之前受到暴雨影響，Charlie就話宜蘭未受影響，當地好好天，問到可會不捨囝囝去拍戲？佢話：「都會㗎，接拍前我都考慮晒好多嘢，安排好晒，包括請埋保母照顧小朋友，因為孖仔都一歲半，可以自己食嘢，係最好玩嘅時候。我出發去拍戲前，已經日日同佢哋講，媽咪要去拍戲，媽咪要出去呀，雖然唔知佢哋明唔明白，但係呢都會繼續講。」

Charlie又話，今次劇組安排得好好，整套戲要拍攝一個月，但期間會有空檔俾佢返屋企，所以今日出席活動前，都已經返過新加坡，陪咗啲小朋友去動物園玩。

Charlie話日前返新加坡時，老公帶定兩個小朋友去接機，佢離遠望到兩個小豆丁跑過嚟，真係感動到眼濕濕：「當時兩個小朋友，見到我嘅時候，就好似小樹熊咁夾住我，我都好感動，哥哥就熱情，一嘢就衝過嚟，反而細佬就慢慢咁行過嚟，仲要我o氹我佢囉！」

提到郭富城(Aaron)太太方媛今日喺ig貼出囡囡Chantelle彈琴片（新聞連結：　 https://bit.ly/2NhCFdX　）Charlie笑言：「我未睇喎，我仲以為佢會跳番part舞，一嚟就跳番part舞㖭！相信佢囡囡一定好靚女。（勸佢生多個？）有個伴都係好事，因為Aaron都好鍾意小朋友，同佢合作《父子》同《浮城》時，戲入面都有小朋友，見Aaron都小朋友都相處得好好，相信佢係一個好爸爸。」

精選娛聞，喺晒《娛果》
http://fb.com/appledailyent