潮媽陳慧琳(Kelly)日前為美心月餅拍廣告,有份演出的4歲小男孩跟蝦餃仔同年,令Kelly感到特別親切,兩人齊齊戴上兔仔頭箍又玩氹氹轉,似足兩母子溫馨滿瀉。Kelly還大讚小男孩的鬈髮好有型,她笑說:「希望細仔小龍包都可以留呢個髮型。」
今年中秋,Kelly會為兩個寶貝仔準備燈籠,一家四口晚飯後賞月食月餅玩燈籠,她說:「細個我會同家姐細佬喺屋企樓下賞月,我會攞自己喺學校設計嘅燈籠玩。」Kelly謂最愛吃奶黃月餅,還教大家一個小貼士,就是用微波爐加熱十秒後才吃,入口更滑溜,Kelly做了兩子之母後,對美食果然更有心得。
撰文:林妃