法蘭迪保亞早前因為水晶宮成績唔好而成為咗英超今季第一個被炒嘅領隊，不過呢位「短命領隊」依然好有幽默感，喺個人Instagram祝賀去劍橋大學讀英文嘅囡囡嘅時候自嘲一番。

水晶宮今季喺英超開季四場比賽兼零入球之後，炒咗荷蘭名宿法蘭迪保亞，當時佢上任只得77日，正當佢要離開英格蘭，囡囡就會去劍橋大學讀英文六個月所以法蘭迪保亞就喺Ig祝福囡囡。

法蘭迪保亞post咗囡囡Jackie張相上Ig，佢留言祝囡囡喺劍橋好運，話以Jackie為榮，仲話Jackie會讀英文六個月，會好掛佢，但焦點呢就喺hashtag度，因為除咗有「自豪」，仲有「耐過佢老竇」，好明顯自嘲緊囡囡留喺英格蘭時間比自己更長，夠晒幽默。

水晶宮炒咗法蘭迪保亞之後，由前英格蘭領隊鶴臣走馬上任，可惜球隊都係未開齋，上場主場以0:1輸畀修咸頓之後今季喺英超五戰全敗，仍然係零入球。