【佛山直擊】謝霆鋒、葛優、衛詩雅和韓星鄭容和等昨日現身佛山出席新戲《鋒味江湖之決戰食神》開鏡，近日霆鋒新聞多多，包括跟王菲世紀復合後頻傳婚訊、前妻張栢芝就被貼街招追數，5歲細仔Quintus則傳拒見老竇，鋒芝發聲明否認，昨日霆鋒被記者追問時，以一招拒答拆解。
問到霆鋒最近有否見囝囝？他說：「唔答，你哋一直知我唔答。」有否跟栢芝聯絡？他說：「都唔答。」再問知否栢芝被追債？他就答：「唔知呢件事。」囝囝跟媽咪住會否擔心呢？霆鋒繼續說：「唔答。」當轉話題講王菲女兒竇靖童出創作英文專輯，霆鋒說：「唔答，但有聽到。」有記者笑言童童的音樂造詣犀利過霆鋒，他說：「就算叻過我有幾難。」此時工作人員想終止訪問，但記者繼續追問他跟王菲的結婚傳聞，霆鋒想了一陣說：「唔係，呢個問題唔答唔得。」有否想過結婚？他說：「唔答。」

鄭容和白冰熱吻戲

此外，同場的韓星鄭容和做拜神儀式時，可能第一次拜神不懂上香，要霆鋒和導演幫手，鄭容和透過繙譯說：「第一次拍這類戲，自己不懂煮食，本來不懂揸刀，甚麽也用鉸剪，現在識用刀了。」問到天氣熱拍戲是否辛苦？他用普通話說：「熱囉，熱死寶寶。」之後他轉回用韓語表示是白冰教他說普通話。
問到兩人有否親熱戲？白冰說：「有熱吻戲，最初很擔心，因為通常在家中親熱，地方很細所以有壓力，之後才投入角色。」是否很期待拍親熱戲？鄭容和笑說：「不是很期待，期待角色融入。」白冰就讚他很聰明，很快聽懂很多中文。
採訪、攝影：曾小嘉