去年底會計師公會理事會換屆選舉，6名「民主進步會計師」成員，喺會員一人一票下，成功「爆冷」晉身理事會後，逾一百名會計師其後要求公會根據公會附例召開特別會員大會，據知大會3月2日召開，議程之一更包括派錢喎！

八方打聽過，當日大會將就3大議題進行表決，包括由4萬多名公會會員一人一票普選公會會長、將公會3.55億元流動資產發還會員，即平均每名會員可獲發回4,000多元，以及檢討行政總裁薪酬過高問題。

據了解，過去公會召開特別會員大會嘅經驗唔多，之前只試過2011年有會員動議一人一票選會長，最終被否決咗，今次過百會員再次推動上述議題，若要成功，屆時投票時須有一半人支持先能成事，雖然今次行動唔係由民主進步會計師發起，但據知佢哋都呼籲會員要積極投票表態喎。