香港拳王曹星如噚晚喺灣仔會展舉行嘅「王者對決」，喺第4回合憑「流星拳」技術性擊倒（T.K.O.）南韓拳手裴永吉，成為WBO同WBC雙料亞洲冠軍金腰帶，藝人好友吳彥祖、徐濠縈、李克勤同老婆盧淑儀、方力申等捧場，親眼見證曹星如贏得職業生涯19連勝驕人紀錄！

賽後阿徐喺社交網貼舉V相，恭喜曹星如19連勝，阿徐透過短訊回覆《蘋果》：「好開心！同好刺激！非常佩服他的努力，勝而不驕的態度，我十分欣賞他！」吳彥祖更連日喺社交網為好友打氣，噚日仲貼咗曹星如喺後台練習嘅相，賽後同樣留言恭喜：「TheChampwinsagain!19-0!」

此外，歌手梁雨恩（Cathy）曾同曹星如合作拍廣告，Cathy接受電話訪問話：「好恭喜佢，有喺網上睇番佢打贏嗰個韓國人，佢好勁呀！我同佢兩次合作，覺得佢個人好謙卑，好nice，成日笑面迎人，希望佢繼續贏落去。」

曾出戰世界性飛鏢賽事嘅Cathy，更乘機向曹星如取經：「之前同佢傾偈我都偷師，運動員喺台上點樣可以咁冷靜？我都係半個運動員，自己喺台上比賽成日都好緊張，問佢喺比賽時個腦諗緊乜？佢話會盡量想將練習過嘅發揮出嚟，其他嘢冇諗，我都有問佢驚唔驚輸？佢都話唔會諗呢啲嘢，基本上佢嘅態度好正面，唔會驕傲或恐懼，好值得我學習。」