蘇志威今日喺西九龍中心出席佢創辦嘅idance跳舞學校舉行嘅活動，佢將會同商場合作，每星期其中一日喺現場提供免費學習跳舞，數口甚精叻嘅蘇老闆話呢個活動三贏，令商場人流多，商台支持跳舞學校，又可以等大家做運動。因為要為草蜢演唱會綵排，所以佢唔會喺現場教跳舞，而佢平時會喺跳舞學校練舞。

現正為十一月嘅演唱會進行密集式綵排嘅蘇老闆話歌已經揀好，而形象設計師朱祖兒之前特別為佢哋喺英國同日本買咗靚布返嚟：「聽講啲布閃令令，好閃好爆，唔係講笑。」而演唱會因為太多歌要唱，未必有嘉賓位時間，仲叫觀眾準時入場。