阿Sa同Chilam今日上《蘋果》娛樂直播節目《今日ENT》分享片場靈異事件，今次合作拍邱禮濤執導嘅《常在你左右》，Chilam笑言今年最奇怪係拍咗兩套恐怖片(之前同阿嬌拍完《京城81號II》)，阿Sa喺隔籬大笑兼扮鬼：「纏住你!」

佢哋本身都信呢個世界有鬼，阿Sa解釋：「睇相佬話我額頭生得好，好難遇到。」Chilam話自己冇親身經歷，不過聽阿嬌講過，嗰日Twins要去做雷宇揚個節目，阿嬌同阿Sa分開坐車去，阿Sa一去到見阿嬌係咁喊，即問咩事，但阿嬌又好驚講唔到，工作人員講咗幾個版本，當中一個最恐佈嘅版本，阿Sa好雀躍想講，Chilam就拎出假手，放喺阿Sa隻手，嚇到阿Sa大叫：「好煩呀你!」

阿Sa再講番個故事，嗰日落好大雨，嗰個司機話阿嬌見到出面有好多溪錢喺度飛，阿Sa話：「當時落緊雨，點會有溪錢飛起，阿嬌就好驚，咁佢就打電話想講俾朋友知。司機同阿嬌講：『唔好講呀!佢哋唔鍾意o架!』阿嬌爬上去想坐副座駕，忽然傳出「卟」兩聲，司機話有啲嘢爬咗喺擋風玻璃，之後再跳走咗，跟住個故事仲未完，講完明明唔係發生喺我身上，我已經勁驚，嗰日係一個活動嚟，七月十四鬼節目嚟，之後過咗幾年，有一個相熟記者講番當日影咗好多相，呢位朋友返屋企將啲相過入電腦，係見到一啲唔應該見到嘅嘢，即刻delete咗張相。」

Chilam搞笑問係唔係影到走光：「咁珍貴嘅嘢都delete，應該叫佢拎嚟睇吓先。」阿Sa話阿嬌成程都睇唔到，不過Twins以後冇再用呢個司機，原來佢出名易見鬼，佢個花名叫「黑仔X」，Chilam問對方有冇轉行，o依家做緊咩，阿Sa就話唔知。

有網民問Chilam覺得阿Sa定阿嬌靚啲，阿Sa嘆氣：「好悶呀!呢個問題。」Chilam尷尬「交波」俾阿Sa，反問阿Sa點睇，阿Sa話當然係阿嬌靚喇，Chilam打圓場：「佢(阿Sa)咁答，我當然話阿Sa靚，兩個都有好完滿。」