【約旦直擊】肥仔為避欺凌學打拳 簡亮泰國際賽初敗不遺憾
曹星如拳擊東京奧運約旦直擊簡亮泰
男人學拳所為何事?為練成《激戰》張家輝身型,還是要一統江湖打出天下?對港隊代表簡亮泰而言,為的只是避過欺凌。縱然初次出征奧運資格賽即被裁判叫停賽事判輸,23歲的他絕不覺遺憾,「輸咗都心滿意足,起碼我都試過。」畢竟從備受欺負的「肥仔」搖身成港隊擂台代表,這一步,簡亮泰已跨得很遠了。
今屆約旦安曼奧運拳擊資格賽中,港隊以75公斤級代表簡亮泰最早出場,他周二對決澳洲拳手韋士頓,初戰國際賽舞台即要打頭陣出場,簡亮泰直言賽前坐立難安,結果面對澳洲全國冠軍他力戰不敵,多次被反擊擊中,結果裁判兩次讀秒後,第二局開局即叫停比賽。千里遠征卻未能戰畢三個回合,簡亮泰自知技不如人,賽後沒多大失望,從容表示「我同對手最大差距係距離感同步法,我真係唔夠靈活,佢又高我半個頭,不過輸咗我都心滿意足,起碼都試過。」本職為救生員的他初中已接觸拳擊,眼前的他肌肉發達,當年卻是屢遭欺凌的「肥仔」,學拳緣由簡單不過,「我肥仔咪被人搣下,鍾意咪打下你囉,學拳就係唔想被人恰呀,走佬又走快啲,強身健體咁。」學拳多載,四年前他初上擂台戰業餘賽,處子戰幾乎變成告別戰,「四年前覺得減磅太辛苦,又唔識照顧自己,周身痛,所以唔打喇。」明知山有虎,但他更不願就此營營役役、虛渡光陰,去年又決定重新投入拳擊世界,自甘受苦,「我都想趁青春想博下,再老啲體能真係跟唔到。」工餘兼顧練習,他聳聳膊只道是磨煉過程,「無話辛唔辛苦,係睇你想唔想做嘅啫。」
今趟出賽簡亮泰與拳壇標誌人物曹星如當起隊友,他大讚Rex親切並樂於指導,「佢教我好多姿勢,佢好nice,好好人而且健談。」他笑言初時與他相處難免戰戰競競,「我以為佢好嚴肅,所以佢一講嘢我就唔講嘢喇。」願望跟隨Rex,踏上職業之路嗎?簡亮泰答得爽直,「喺香港難啲呀,我又唔係咩有錢人家。」
--------------------
【《果GYM》隨身播 健身壹App過!】
教練開班直播 大量健身正片
24小時隨時隨地 互動做GYM
iOS下載 Android下載 --------------------
【匿名港警爆大鑊】
韓國KBS時事節目《時事直擊:香港 被自殺》
一按即睇 --------------------
【撐學生】召集有心人 撐學生全年睇《蘋果》
立即按此 --------------------
《體蘋果》陪你睇波講波
https://www.fb.com/appledailysports
職為救生員的簡亮泰初中已接觸拳擊,眼前的他肌肉發達,當年卻是屢遭欺凌的「肥仔」。
面對澳洲全國冠軍,簡亮泰多次被擊中,結果裁判兩次讀秒後,第二局開局即叫停比賽。
港隊以75公斤級代表簡亮泰最早出場,他周二對決澳洲拳手韋士頓。