新地郭氏家族長子郭炳湘上月於港島深水灣道新地郭家大宅暈倒後送院，其胞弟郭炳聯連日嚟都有到醫院探望兄長。

郭炳聯喺今晚6點08分左右離開醫院，只見佢有一名保鑣護航，另有一名相信係醫院工作人員送郭炳聯上車。一眾記者問郭炳聯有關郭炳湘嘅最新狀況，平日好有耐性嘅郭炳聯今日顯得有啲急，但仍面帶笑容咁話：「我今日冇嘢講。」保鑣為佢開門，而工作人員就一直叫記者探訪時唔好行咁埋。

另外，醫院方面設置咗一個記者區俾記者，繼續提供蛋糕、果汁、低咖啡因嘅茶同咖啡等茶點，更有風扇調溫，照顧周到。