【人事變動】肩負大project重任!馬會回巢高層「孭重飛」
利達賢從化馬匹訓練中心阿Joe祁立賢
掌管賽馬事務嘅馬會管理層有人事調動,祁立賢突然辭任賽馬業務及營運執行總監,由前賽馬事務執行總監利達賢回巢接替其職位。
祁立賢做做吓唔玩,自然引起外界揣測其離職原因,內裏乾坤只有當事人最清楚,但係人各有志,喺職場轉環境另謀新發展亦好正常。
普羅馬迷對利達賢唔會陌生,佢曾加入馬會接替應家柏出任賽馬事務執行總監,足足做咗超過八年,絕對講得上係老香港,直至前年先離職返去祖家美國。
利達賢在任期間,馬會內部都形容佢係個好好先生,對佢評價相當唔錯,手下亦熟悉呢個阿頭嘅處事作風。
今次利達賢返嚟雖然職銜轉咗,但負責嘅範疇都係佢以前跟開嘅,可謂駕輕就熟。平心而論,利達賢對過去十年間香港賽馬嘅發展非常熟悉,喺馬圈亦有人脈網絡,佢唔需要慢慢摸索適應,照計馬會都算搵啱人填補空缺。
新任賽馬事務執行總監夏定安係實幹型作風,有利達賢幫手,點計都係好事。
事實係利達賢上任後,主要係跟進從化馬匹訓練中心落實啟用。據知馬會暫定從化馬匹訓練中心喺今年8月尾正式開幕,比預期稍稍延遲係因為遷就一眾重要嘉賓出席開幕禮。
從化基地係馬會興建沙田馬場後,最大規模嘅賽馬基建,馬會當然高度重視呢項計劃,可以話利達賢一返嚟就孭重飛。
馬會已經不斷做測試運馬,來往沙田同從化兩地,雖然訓練基地喺8月尾先開幕,但相關工程應該喺6月已經搞掂,預計大約6月中就會有現役馬運上去,有關馬房工作人員亦會開始打點開倉事宜,相信部份今季提早歇暑嘅馬會做先頭部隊,率先進駐訓練基地。