美斯(中),美斯,都係美斯!喺周日巴塞隆拿作客大炒畢爾包5:2嘅西甲,五個入波都關美斯事!佢先喺十五分鐘主射罰球省中人入網,之後又造就蘇亞雷斯入波;換邊後美斯兩分鐘內先喺左路傳中搞到對手擺烏龍,再妙傳尼馬建功,加埋完場前策動攻勢,由阿蘇交畀柏度洛迪古斯湊成隊史第五百場聯賽作客勝仗。美斯勁到咁,教練安歷基賽後例牌讚吓全隊之餘,都話有佢喺陣中係榮幸喎;我求大俠明明記得,講緊兩人不和只係上個月嘅事,好彩巴塞之後踢出九連勝,咩不和都化解晒啦。佢哋𠵱家廿二戰五十三分,僅落後榜首皇家馬德里一分,連埋五十分嘅馬體會,三頭馬車有排鬥。