講到正音,家吓考緊中文口試嘅文憑試考生感受就至深,因為中文要考朗讀,文章入面有九個字不能讀錯,否則就會影響分數。潘國森同彭志銘就質疑,考評局視何文匯讀音為正統,但係好多字以香港通用嘅讀音發音,已經足夠。
潘國森列舉十大例子,好似「時間」、「報刊」、「購買」,「會計」等,認為讀到好似何文匯咁「標準」,即係時「奸」、報「看」、「救」買、「潰」計,實在奇怪。何文匯就澄清,佢冇份製作考評局評分標準,佢個人就堅持如果讀音搞亂個意思,就要矯正。「例如夭折個夭,讀成『腰』(的話),意思變咗開心,咁就唔啱」。不過,聽聞文憑試嘅朗讀將取消,貫徹香港教育制度天天在變嘅特色。