郭富城、楊千嬅、萬梓良（萬子）、鮑起靜同張達明等，噚日喺土瓜灣為新片《麥路人》開鏡拜神，萬子先後向城城同千嬅派利是，原來係畀佢哋子女。
城城戲中扮演金融才俊，佢有留鬚造型，佢話收到劇本已決定要接：「我同千嬅第一次合作，同萬子合作過電視劇《成吉思汗》，當時我訓練班未畢業。」千嬅笑言：「萬子好好戲，佢圍讀時，拍晒枱話『so what』。」
問千嬅係咪同城城演情侶？佢賣關子：「複雜過，我哋同是天涯淪落人，呢個故事係講無家者，有5個分線，我係其中一個，最貼地係呢幾年喺24小時快餐店都有無家者，其實佢哋有故事，我做晒資料搜集，聽過真實故事。」城城之前被影過摷垃圾戲份？城城話：「係嘅，呢部戲幾貼近寫實，我都有去旺角、深水埗、廟街同土瓜灣，平時好少去，再去有好大親切感。」

萬子會飾演潦倒無家者「等伯」，劇組早前安排佢去接觸無家者，萬子慨嘆香港有咁嘅情況，覺得悲涼。萬子噚日帶埋老婆開工，佢話：「呢半年，我嘅血糖同血脂都好高，醫生話唔食藥，以後都拍唔到戲，腳行唔到，之前有人搵我拍動作戲都推咗，我冇信心完成。呢半年，太太監督我食嘢，我以前係飯桶，𠵱家食少咗，夜晚食小米粥、粗糧，按時畀藥我食，𠵱家血糖血脂指數低咗，望邪惡食物，見到當食咗。」萬子講完即錫太太一啖，多謝對方無微照顧。
撰文：馮仁昭