當年今日
關於我們

阿倫自爆遭中國紅十會迫捐50萬?

蘋果日報 2013/04/24 06:00


阿倫譚詠麟日前同李克勤去咗大馬檳城,演出巨星慈善演唱會,被指摘為錢而甘心為貪腐政權服役。雖然阿倫已講明係因為簽咗約,唔可以話唔去就唔去,仲暗示同事政治不敏感,以致鬧出此軒然大波。

奇就就在,今日網上,忽然瘋傳一段聲稱係「譚咏麟」講嘅說話,話自己被惡名遠播嘅中國紅十字會「迫捐」,注意,是「咏」不是「詠」,內文如下﹕

「譚咏麟對我報怨道說,大陸的紅十字會很黑、很霸道,強勢的叫我向他們捐款50萬元人民幣,說是叫我起個帶頭作用(曾志偉也接到同樣的電話)如果不照辦,他們說:他們跟有關部門說一下,以後大陸的演出和藝人活動我們還想參加,那是做夢……」

網上消息指,以上提到嗰個「我」,叫李鐵;咁啱,與《南方週末》評論員、前《時代週報》主筆李鐵同名同姓。唔通係真嘅?呢篇嘢喺內地微博今早開始瘋傳,家陣香港嘅facebook都係係咁傳緊。

呢排四川地震,中國紅十字會種種黑暗面亦震埋出嚟,依家爆出咁嘅消息,話阿倫自爆被「迫捐」,仲講到「很黑很霸道」,真係好嚴重。而且,係咪真係由阿倫把口講出嚟呢?只消諗一諗,睇番阿倫日前回應大馬風波一事,佢都冇好激烈嘅回應,試問又點會開腔轟中國紅十字會呢?而且,阿倫都贊成國民教育,心繫中國山河大地,點會……

其實呢單嘢,係2011年9月底左右爆出嚟嘅,而且,李鐵亦已於微博回應道﹕「我已經用港片台辭回應了:「老大,真的不關我事啊!」(大佬,真係唔關我事0架﹗)

所以,呢單所謂阿倫鬧爆中國紅十字會,不只是舊聞一則,更是流料一則。