【疫市開業】抗爭壁畫遭抨擊 「煲底」老闆道歉
蘋果日報 2020/06/11 00:00
火鍋店黃店黃色經濟圈煲底
黃店食肆老闆威哥與舊股東因政見不合拆夥，今年2月與同路人合資約250萬元重新出發，「抗爭，最尾煲底見，我哋要勝利，所以決定用『煲底』呢個名。」疫市開店，租金較舊租平約三成。「煲底」本月初試業，沒料到一幅抗爭壁畫，被網民抨擊，其中一句「呢幅壁畫對住陳彥霖、周梓樂兩位手足打邊爐食得落？」這句令威哥心如刀割。他本將心向黃店，奈何被選作批鬥，遂主動尋求《蘋果》訪問，希望向手足道歉、解畫，認為「多啲人加入我哋黃色經濟圈，壯大係指日可待，但如果再不停你批鬥我，我批鬥你，大家唔夠齊心，好難達成嗰個目標！」
同路人合資250萬再開火鍋店 疫市搵舖慳頂手費
70後威哥經營食肆多年，去年社運以來，「我哋抗爭，跟住表態，一路經營一路支援，後期與舊拍檔意念唔相近，所以我決定離開，去做一間我自己想做嘅店。」今年2月與舊拍檔拆夥，然後重新出發，與同路人合資約250萬元。當時食肆結業潮之聲不絕於耳，他仍堅持開店，「當時好艱難，但點解選擇都係要呢個時間去開，最主要有一班夥計跟咗我好多年，約20人，佢哋都要食飯，咁我哋就算點艱難，我哋執意都要開返間食肆」，「呢間餐廳大家意向一樣，同一理念，同一信念，就係抗爭，最尾煲底見，我哋要勝利，所以我哋決定用『煲底』呢個名。」
他原本目標是搵頂手舖，但疫市下，頂手費都慳返。威哥稱：「真係好彩嘅。呢段時間可能好多舖都係有咁嘅情況出現，我唔知啦，但我真係好彩。理論上呢度唔算頂手，因為直接同業主傾。呢度之前商戶係畀執達吏執咗，所有舖裏面嘅工具全部歸業主。」據悉，他目前承租樓上舖，建築約5,000方呎，月租15萬元，現租較舊租平約30%。他承認，疫市才可以低成本開業，「講真就算而家疫情搵舖，分分鐘都仲有頂手費，更何況你話唔係疫情？」
黃店老闆威哥：多啲人加入黃色經濟圈 壯大係指日可待！
6月初試業，店內一幅壁畫，紀錄去年社運至今，多件永遠不能忘記的事情，其中陳彥霖及周梓樂的頭像置於畫的正中間。這幅畫被網民上載於「連登」後，引起大部份抨擊，包括「呢幅壁畫對住陳彥霖、周梓樂兩位手足打邊爐食得落？」、「first aid姐姐無咗隻眼已經慘，仲要俾你啲X街拎嚟賺錢食人血饅頭」。事後威哥尋求《蘋果》訪問，希望向手足道歉及表明心迹。而他於日前已自拍短片上載於其Facebook專頁致歉。至於插畫師是誰，當事人不想說。
威哥表示：「我為我喺開業時嗰幅畫嘅失當，致歉！我哋民主社會，順應民意係應該。將比較敏感嘅部位刪除作出修改。」他解釋：「其實喺去年8月開始構思一幅畫，當時完成後就擺喺舊店，當時都引起好大回響。咁而家我哋出走，我哋都執意要帶走呢幅畫，因為我希望帶走我哋嗰個信念、靈魂去新店，繼續行落去。結果新店擺出嚟，我承認當時處理唔好，試業時一大群人對住幅畫合照，令好多人覺得唔舒服，因為佢哋覺得點解會喺幾個走咗嘅戰友面前去影相呢？好唔尊重。」
被人指食人血饅頭，他回應：「我唔認為我自己食人血饅頭囉，講真一樣嘢，點食人血饅頭啫，我哋喺大風大浪嘅日子開一間舖，唔容易㗎。我哋用我哋僅有成本去開，其實我哋都膽顫心驚。（驚咩？）難聽啲講句，黃店唔係一定有生意㗎嘛，係咪先？咁我相信一個同業講過一句話『黃藍是政見，好食是良知』，我相信最緊要做好出品就會有人欣賞，憑呢個信念我哋咪做囉，就咁簡單。」
他強調自己是「黃店」，「我以前係做黃店，今時今日都仲做緊黃店，以前預咗，今時今日都一樣預咗。」他認為黃色經濟圈需要齊心，「而家經營黃店真係好艱難，你開一間新嘅黃店，你好驚俾人批鬥，問你係咪偽黃？變咗好多人都唔夠膽去做。大家會唔會宏觀啲去諗呢？如果真係有人去做我哋呢件事，多啲人加入我哋黃色經濟圈，壯大係指日可待，但如果再不停你批鬥我，我批鬥你，大家唔夠齊心，好難達成嗰個目標！」
採訪、編撰：財經組
-----------------------------
-----------------------------
威哥尋求《蘋果》訪問，希望向手足道歉及表明心迹。
黃店食肆老闆威哥與舊股東因政見不合拆夥，今年2月與同路人合資約250萬元重新出發。
威哥表示：「抗爭，最尾煲底見，我哋要勝利，所以決定用『煲底』呢個名。」
店內一幅壁畫，其中陳彥霖及周梓樂的頭像置於畫的正中間，引起網民抨擊。
壁畫紀錄去年社運至今，多件永遠不能忘記的事。