不顧而去｜善心裝修師傅捱撞恐截肢 家屬懸紅尋車CAM緝兇

蘋果日報 2020/11/19 01:08

不顧而去車cam截肢
    【11:37】傷者家人及《蘋果 》向警方查詢交通意外調查進展後，事主指警方至昨晚即意外發生後第13天，終於派人把傷者的電單車拖走化驗。另有傳聞指警方已尋獲疑引發車禍的汽車及司機，《蘋果》正向警方求證。
    ----------------
    兩周前的星期日藍田發生嚴重車禍，懷疑有大型車「貪快」在路中心掉頭，撞倒一名剛為街坊修葺居所的熱心電單車司機後竟不顧而去。司機左腳及腳掌慘受重創，多處骨折骨裂，有機會永久傷殘甚至要截肢。但意外後警方被質疑「hea查」，僅列作「交通意外有人受傷」處理，連涉事電單車也未有拖走檢驗，恐令肇禍司機逍遙法外。家屬為討回公道自發派傳單及廣貼街招，懸紅尋找「車cam片段」緝兇，望好心人提供線索找出肇禍的無良司機，「佢哋（警方）做唔到嘅我自己做囉，做得幾多得幾多」。
    記者：趙媛媛 梁德聰 郭杏妤
    受傷後近2周仍須在醫院留醫的64歲傷者李師傅嘆稱，車禍後10日內已進行3次手術，現暫時脫離危險期，腿內碎骨已大致清除，並於腳掌位置落了三支鋼釘作暫時支撐之用，但未來須再做手術。但李直言，望到腳上慘烈的傷口時大感「心寒」。他坦言現時傷口仍持續疼痛兼腫脹，腿部尚未能郁動，醫生更告知病情惡化恐要截肢，令他和家人憂心忡忡。
    李師傅憶述，9月13日（周日）晚上10時許，剛為街坊修葺曾失火的居所，打算到茜發道網球場散步及沖身。他駕駛電單車沿茜發道行駛，至藍田地鐵站D1出口時，突然下起傾盆大雨，「我就繼續上斜，見到一架綠色的大型車（旅遊巴或小巴）橫跨咗行車線，阻擋我前路」。當時大雨影響視線，李曾多次「響安」示意，「我靠右駛想避開佢，點知我一路行佢又冇停車，我一路扭軚向右避，最終避到差唔多上行人路石壆，(兩車)就相撞」。
    李師傅坦言車禍猛撞一刻他已陷昏迷，醒來時感到左腿感到非常疼痛，肇事車輛則已不顧而去，不見蹤影。意外發生後不久，跑完步剛離開晒草灣運動場的莫先生見到傷者李師傅，即時報警，莫指現場頗為混亂：「我見到電單車向右翻側，李生坐咗喺坑渠，一隻腳擺咗落坑渠嗰度，當時落好大雨，啲坑渠水沖住佢啲傷口。」莫當時擔心大雨會令李生傷勢更嚴重，曾建議不如他先跑去運動場借一把傘為傷者擋雨，「但佢(李師傅)唔係好想我離開佢。」他稱當時一直等到救護車送李師傅離開，仍未見到警員到場調查。
    其後，兒子阿樂接獲警方通知指父親遇車禍已送院，須做手術搶救。阿樂引述醫生的說法，李左腳受重創，小腿有兩處開放式骨折，腳掌骨多處碎裂，腿部血管受壓，部分組織呈瘀黑色，李更一度休克，情況十分危險。
    「爸爸佢話康復後也可以出返嚟，要揸電單車去行俠仗義呀，去幫啲街坊，我就話到時先啦，唔想令佢失望。」阿樂指手術過後，醫生向他表示父親須留醫最少8至12個星期，「話要有心理準備（日後）有機會係不良於行。」他續指，父親甚至有兩至三成機會須截肢，「因為佢傷口都好大，隻腳如果細菌感染、肌肉腐爛，可能就要切」。
    遭李師傅亦感無可奈何，現盼能早日康復，盡快回復正常生活，「盡人事，知天命囉，冇咩辦法㗎啦，希望警方快啲追緝到肇事司機」。李估計該車輛疑為「貪快」而在路中心掉頭，但當時環境昏暗，加上滂沱大雨使視野模糊，故他未能認清車輛型號。
    警方調查力度不足，亦令李家感到沮喪。李師傅指出，車禍翌日他已向警員透過電話講述遭車輛撞倒經過，惟警方一直未能緝獲肇事司機，甚至未有在意外後即時拖走電單車檢驗殘留在車身、疑屬於肇禍大型車的綠色漆油，恐令肇禍司機有機會逍遙法外。（詳見另稿）
    案發現場的茜發道至茶果嶺道交界路長約半公里，其中藍田站D1出口外設兩小巴站，亦有旅遊巴在此上落乘客，到晚上最少有50輛私家車、旅遊巴及貨櫃車在路邊停泊，故李家認為很可能有泊於上址車輛的車CAM，在機會拍攝到下撞傷李師傅的大型車的逃離經過及及車牌。為了替父親討公道，緝兇心切的阿樂日以繼夜地在該區貼街招、派傳單，「佢哋（警方）做唔到嘅我自己做囉，做得幾多得幾多，雖然渺茫，但會堅持到底」。李家更懸紅1萬，盼有好心人提供當日的行車影像紀錄，惜未有回音。
    警方發言人回應指，9月13日晚接獲報案，指一名64歲男子駕駛電單車沿觀塘茜發道上斜，其間懷疑失控撞向行人路。男電單車司機受傷，清醒被送往聯合醫院治理。案件列作交通意外有人受傷處理，由東九龍總區交通部意外調查隊跟進，有關意外成因仍在調查中。
    【報料方法】 若市民拍攝到意外一刻又或是不顧而去重型車的相片或短片，均可致電或WhatsApp到《蘋果》24小時報料熱線報料：63836568
    empty
    李師傅左腳受重創，小腿有兩處開放式骨折，腳掌骨多處碎裂。受訪者提供。
    empty
    李師傅左腳受重創，小腿有兩處開放式骨折，腳掌骨多處碎裂。受訪者提供。
    empty
    李師傅直言，望到腳上傷口時大感「心寒」，現持續疼痛且傷口腫脹，腿部尚未能郁動。
    empty
    李師傅透過視像訪問向記者展示傷勢，左腳已打上多重石膏。
    empty
    李師傅的電單車損毀，車身有多處斷裂及破爛，依然停泊在事發現場未被拖走。梁德聰攝。
    empty
    李師傅的電單車損毀，車身有多處斷裂及破爛。梁德聰攝。
    empty
    李師傅的電單車損毀，車身有多處斷裂及破爛。梁德聰攝。
    empty
    李師傅的電單車損毀，車身有多處斷裂及破爛，頭盔亦被撞爛。梁德聰攝。
    empty
    阿樂發現車身上留有可疑綠色油漆，疑為涉事車輛留下的證據。梁德聰攝。
    empty
    兒子阿樂指連日四處奔波尋兇，「佢哋（警方）做唔到嘅我自己做囉，做得幾多得幾多」。梁德聰攝。
    empty
    為了替重傷父親追回公道，兒子阿樂指連日四處奔波貼街招，並懸紅1萬港元緝兇。梁德聰攝。
    empty
    目擊者莫先生指，當他發現李師傅時，他已神智不清，受傷的左腳亦浸落雨渠。梁德聰攝。
    empty
    現場為藍田茜發道斜路，最少有50輛私家車、旅遊巴及貨櫃車在路邊停泊。鄭大康攝。
    empty
    現場為藍田茜發道斜路，最少有50輛私家車、旅遊巴及貨櫃車在路邊停泊。鄭大康攝。
    empty
    記者發現不少大型車輛包括旅遊巴及小巴均會在馬路中心掉頭，狀甚牙㾓。鄭大康攝。
    empty
    記者發現不少大型車輛包括旅遊巴及小巴均會在馬路中心掉頭，狀甚牙㾓。鄭大康攝。
    -----------------------------
    你敢爆，我敢獎！ 立即WhatsApp 《蘋果》24小時爆相爆片熱線 或致電：63836568
    -----------------------------
    《蘋果》英文版免費試睇：了解更多
    英文版已登錄《蘋果》App，立即下載/ 更新：iOS / Android
    -----------------------------
    支持蘋果深度報道，深入社區，踢爆權貴，即Like蘋果專題及調查組FB專頁！