呢期可以落場衝轉嘅股仔唔少，但認真抵買嘅就真係買少見少，華翔微電（1195）超抵買。華翔主打印刷線路板，繼06年度純利穩升26%，最新07年度中期（12月止），純利又升30%到6590萬銀。半年間，集團主打剛性及撓性印刷線路板嘅廠房使用率，唔係去到飽和，就大升到8成水位，生意好到不得了。就當新廠房投產需時，華翔07年全年度純利，只係keep到30%增長，全年純利都講緊1.3億銀，PE都係得4.5倍。
再講，華翔半年結日，手頭淨現金貼近4億銀，每股淨現金都講緊0.7元，財務狀況又係靚爆鏡。家陣揸住華翔嘅投資者，有AtlantisInvestmentManagement（7.2%），呢個月頭，股壇長毛DavidWebb持股量曝光，揸住華翔2778萬股（5.02%），專業投資者眼光，又有加分因素。華翔現價（1.09元）就算翻一番到2.18元，PE都仲喺單位數，抵博。

莊士國際（367）上星期三，試完20日線後，有勢想再衝，可以諗諗。莊士揸住本港優質投資物業，上年9月底時，投資物業賬面值29億銀。而同一批物業，97年時估值超過40億銀，今時今日嘅估值，保守到爆。以差額冧上去，莊士NAV上到2.8元，現價（0.83元）折讓講緊高達70%，炒折讓吸引到痹。
以莊士60%折讓做目標，股價要升35%到1.12元，以50%做目標，莊士要升68%到1.4元，炒折讓，實情大把水位。
錢雋