呢期可以落場衝轉嘅股仔唔少,但認真抵買嘅就真係買少見少,華翔微電(1195)超抵買。華翔主打印刷線路板,繼06年度純利穩升26%,最新07年度中期(12月止),純利又升30%到6590萬銀。半年間,集團主打剛性及撓性印刷線路板嘅廠房使用率,唔係去到飽和,就大升到8成水位,生意好到不得了。就當新廠房投產需時,華翔07年全年度純利,只係keep到30%增長,全年純利都講緊1.3億銀,PE都係得4.5倍。
再講,華翔半年結日,手頭淨現金貼近4億銀,每股淨現金都講緊0.7元,財務狀況又係靚爆鏡。家陣揸住華翔嘅投資者,有AtlantisInvestmentManagement(7.2%),呢個月頭,股壇長毛DavidWebb持股量曝光,揸住華翔2778萬股(5.02%),專業投資者眼光,又有加分因素。華翔現價(1.09元)就算翻一番到2.18元,PE都仲喺單位數,抵博。