南非騎師杜美爾在香港策騎短短兩個月，合共勝出十三場頭馬，可以講已經站穩陣腳。

練馬師呂健威係杜美爾主要支持者之一，呢對騎練組合至今已交出三場頭馬，周日(7日)第四場「大紅包」及第七場「陽明豐豐」都交由杜美爾上陣。

今朝(5日)兩匹戰馬都由騎師親自策騎在大圈跑道操練，呂健威在烽火台地下觀察馬匹走勢後，專程走到飛機坪搵杜美爾，騎練密斟差不多十分鐘。

「陽明豐豐」今季在田草1200米取得一冠兩亞，後上馬今次增程跑1400米，估計更啱腳法，有力爭勝。