舊年以九龍社團聯會健康大使之名搶閘宣傳嘅建制派陳凱欣,最終勝出11.25九西補選,佢嘅選舉開支申報噚日出爐,仲記得當日九龍社團聯會用健康大使之名為佢搶閘宣傳,租起紅磡一大廈的外牆廣告傲視殯儀館,仲大賣小巴廣告等等,八方以為選舉開支必然很「和味」,點知佢申報嘅總開支埋單只花了146.2萬元,低過選舉上限36萬元,因為佢用健康大使牌頭搞嘅一切宣傳,完全冇計入去,而佢用最多係選舉廣告,共使咗97萬元作選舉廣告,當中最奇嘅係,有發票寫明佢用咗9,200元印20萬張「掌心雷」模擬票卡,以佢10.6萬得票計,平均1.8張掌心雷就為佢賺得一張選票㗎喇。
另外,開頭唔認建制派嘅陳凱欣,選舉開支申報顯示好多建制派有幫佢,包括所有當區建制派樁腳都有為佢廣發錄音宣傳,多個議員辦事處以及深水埗南昌區居民商戶聯會等地區組織,都有租借地方予她貼海報、存放物貨。