當年今日
關於我們

【呢幾年求婚】驚喜旅行賀女友生日 洪卓立:冇兩個去三個返

蘋果日報 2016/10/28 16:56

洪卓立英國素食湯怡

洪卓立(Ken)今日下午去到中環推廣素食,剛同女友湯怡遊完英國嘅佢一嚟就笑話:「今次只係旅行,唔係求婚、唔係預支蜜月、冇兩個去三個返,只係一個俾佢驚喜嘅旅行,因為從來未試過喺佢生日時去旅行。」
Ken話其實今次旅程仲有其他朋友,旅程中拍咗好多片,所以掹車邊當係半工作半娛樂。咁帶咗湯怡去邊度玩?佢話:「好多地方呀,其中同佢去咗玩一個好高嘅瀡滑梯,我哋玩完都有啲頭暈腳軟差啲嘔,不過好好玩。」
除咗旅行,仲準備咗啲咩禮物俾女友呀?Ken話:「佢即將要去成個月杭州拍嘢,佢又好怕凍,所以送咗樣高科技嘢,俾佢掛喺頸會出冷暖風嘅風機俾佢。」咁幾時先真正求婚啫?佢話:「係呢幾年㗎啦,俾啲時間我準備吓啦。」