近日短訊騙案猖獗，就連立法會議員都中招！自由黨黨魁鍾國斌今日就向一眾記者發短訊，話自己手機中毒，若果收到代購任何產品嘅WhatsApp，千祈唔可以上當。八方見到，當然要問個究竟？原來Felix因為誤click另一個記者嘅短訊而中招，仲不慎將病毒擴散，認真陰功豬。

Felix話呀，今早佢老婆、細佬同埋唔少好友都收到一個奇怪短訊，內容係要求對方代買電話sim卡、或者提供認證碼，聰明嘅鍾太當然立即打俾Felix求證，一問之下，原來Felix手機中毒，仲經由WhatsApp將病毒擴散。Felix立即採取急救措施，將手機留俾公司同事處理，亦向所有朋友發短訊，提示大家唔好上當。佢話好在平時有Keep兩個電話嘅習慣，即使有一部中毒，都有另一部可以替補。