香港中華廠商聯合會一班領導層今日同傳媒午宴，新任會長吳宏斌提到未來工作方向除咗繼續幫助中小企，亦要努力推動再工業化，希望吸引更多年輕人加入工業界，達到傳承作用，同時要配合創新創意呢個大環境。

咁佢有乜計仔落實大計？佢話心目中正構思緊，點樣可以同各大院校合作，讓校園內嘅研究可以商品化，方法之一係搞比賽，徵集唔同嘅概念，勝出者可以獲廠商會贊助，將啲概念產品化。

吳宏斌仲話，過去廠商會有錢都係買吓樓、買股票等嚟投資，雖然可以幫個會儲錢，但要真正令業界受惠，始終要投資番業界，又難怪佢想以比賽形式作重點投資！