當年今日

早飛2+5:西維爾勢破柏廸遜 - 牽牛

蘋果日報 2008/12/01 00:00


上周中早飛倉命中羅馬客W外,亦中番條歐聯加歐協3串4,結餘成功上番6位數字,希望之後同畢傑齊齊努力,令結餘有升冇跌。
既然貼歐協盃順,今個周中再推介歐協盃,重心場合係西維爾;西維爾無疑上周六聯賽主場大敗予巴塞隆拿0:3,不過細看比賽過程並唔係一面倒,簡路廸都有追和機會。講真當今球壇,又有邊幾隊頂得住巴塞,今次再度主場出擊,要畀多一次機會西維爾。
紅魔用後備寧博布力般
西維爾連贏06同07兩屆歐協盃,深明分組賽出線秘訣,就係主場兩仗贏波就差不多出梗線;第一場分組賽西維爾就主場擊敗史特加,第二場作客輸畀安德列治僅輸一球,不過只要周三擊敗柏廸遜,出線就相信冇問題;要留意前鋒路爾斯法比安奴上仗對巴塞攞紅牌,未來聯賽要停賽,今仗唔使留力,自然出真功夫大數對手。塞爾維爾嘅柏廸遜,擺明唔夠班踢歐協盃,分組賽3戰全輸,已經出線無望,今仗只屬例行公事,睇個勢都係等畀西維爾炒。
配腳方面,先博曼聯「獲利回吐」,周三英聯盃賽事贏唔到布力般;曼聯上仗「打吡」險勝曼城,基斯坦奴朗拿度(C朗)紅牌出場,令隊友消耗更多,相信費Sir起用大批後備應付;講真布力般近期個勢都好差,不過考慮恩斯踢曼聯咁多年,既然曼聯唔吼英聯盃,益吓門生都好,博布力般不敗;周四歐協盃賽事,荷甲嘅海倫芬攻強守弱,對住分組賽連輸兩仗嘅布拉加,入球「大」值得串埋。
牽牛
周中超級重心
星期三2
莫斯科斯巴達勝(1.52)
天寒地凍,俄羅斯球隊更添主場優勢,奈梅亨上仗荷甲大勝魚腩球隊,只屬假象。

星期三8
標準列治勝(2.25)
標準列治近況甚銳,能主場擊敗西維爾,絕不可輕視;森多利亞上仗聯賽已輸波,作客戰力未足信。

星期四3
哥本哈根大(1.82)
兩支北歐球隊交手,哥本哈根攻力一向有保證,而洛辛堡自聯賽收「咧」,近況一落千丈,兩軍都唔穩,宜取大。
難啃早餐
星期三5
曼城贏唔到
曼城分組賽兩戰全勝,出線在望,而且大戰完曼聯,今仗可和波睇定嚟食。相反,聖日耳門屬搵食波,剛輸完畀雷恩,可能施回馬槍。
〈早飛倉〉
主菜:星期三7西維爾勝[-1](1.55)@1,500

渾水摸魚過關:星期三7西維爾勝[-1](1.55)x星期三13布力般流浪勝[+1](2.6)x星期四4海倫芬大(1.78)[email protected]

今日早餐價錢:-$2,000
上兩日賺蝕:+$7,440
早飛倉結餘:$101,474
規則:$100,000本錢,每日買早餐最多動用$5,000,最少$1,000,逢周二、五起身食早餐(見報)。