啱啱榮升奶奶嘅薛家燕，婚宴過後，今日再度投入工作現身新城，為主持嘅節目訪問張文慈(Pinky)，剪咗一頭短髮嘅Pinky 話：「因為六月尾要開新劇，劇中要飾演女警司，所以特登轉新形象，自己都十幾年冇剪短個頭髮，o依家適應緊。」

至於新奶奶家燕姐話，呢幾日出街好多市民見到佢都大聲嗌佢奶奶：「真係好開心，同時婚宴好盛大，呢幾日體力透支，真係好攰。」家燕姐笑言婚宴當日原本預備咗五套衫，最後只係着咗四套，佢話：「第四套我想去換衫時，大女同我講話要送客啦，所以留番一件未着。」

家燕姐透露第五套衫非常閃，或者留喺16號囝囝嘅西式婚宴Party上着：「今次就會係西式，招呼囝囝同新抱嘅朋友。」另外，日前網上流傳一條聲稱係家燕姐新抱嘅性愛短片，佢話：「我睇過啦，一睇就知道唔係，啲人咁樣做唔係幾好。」問到囝囝同新抱有冇唔開心？佢話：「我有同佢哋講叫佢哋唔使理，其實佢哋呢兩日要搞Party都好忙，完全都唔得閒理。」

精選娛聞，喺晒《娛果》
http://fb.com/appledailyent