英超水晶宮之前喺開季連輸四場聯賽後，炒咗今個夏天先至上任嘅法蘭迪保亞，搵嚟鶴臣頂佢個位。不過，佢老人家都唔係好得幾多，接手後兩場聯賽都輸波之餘，仍然係入唔到波，同法蘭迪保亞一樣，只係可以喺英格蘭聯賽盃贏波兼入波。嚟緊禮拜六水晶宮要作客曼聯，球隊就諗到辦法幫一班球員重建信心。

所謂嘅辦法其實就係「對症下藥」，既然水晶宮係咁輸波，咁只有贏波先至可以有番啲信心㗎啫。但係，以水晶宮家陣嘅情況，踢咩波贏面先至較大呢？英國《鏡報》報道，水晶宮呢個禮拜會約一支球隊踢場友賽，對手叫Bromley，係National League嘅球隊。咩係National League？就係英國第五級別聯賽嘅球隊，即係英國丙組呀。用到大蝦細呢一招嚟幫球隊恢復信心都諗得到，真係要寫個「服」字畀度橋嘅人。

不過，個「服」字會唔會變咗「伏」字，大家係未必會知道㗎，因為呢場波係會閉門進行嘅。報道話鶴臣打算用呢場波嚟試陣，係要嚟備戰對紅魔鬼場波嘅。唔通鶴臣真心以為喺呢隊丙組仔身上，可以練得出克制到曼聯嘅招數？