𠵱家朝朝晨早要起身,去禮賓府同煲呔開會,又要喺政府總部坐鎮,生日重要去立法會對住四大狀、長毛、馬丁、卿姐同達仔班「反對黨」,重有乜好慶祝呀?
最近有人傳,○七年如果冇人夠班做政務司司長,肥龍可以冧莊,講呢番言論嘅人可能唔熟肥龍,因為佢老哥嘅生日願望,係早走早着,捱義氣頂埋呢一年,幫煲呔搞掂埋競逐連任就收工。箇中原因,相信同許太有關,煲呔如果唔交人,家變都有份!肥龍點敢唔走?另外,政改出師不利,佢都冇面目見江東父老,橋王招牌一上場就俾人拆咗,重邊有癮留低。
肥龍實在一副死膽,而且懶過條蛇,原來立法會西九小組早前叫過肥龍出席今日會議,講最新進展,點知肥龍都話冇需要,噚晚政府重出稿,話需時研究入圍財團嘅疑問,等行會有結論,肥龍自然會現身。傑哥同班委員當然俾佢激到紮紮跳,即時叫秘書處整份研究文件,睇睇過往有幾多官員會拒絕出席會議,據知真係唔多,肥龍等住俾尊貴議員們開年啦。
爆料熱線:29290000、27860099
報料傳真:26239278
報料電郵:
[email protected]