大專生搞就職典禮搵食物贊助成日惹爭議，尤其深水埗明哥事件後，大專生們搵贊助商都小心咗好多，但日前有賣狗狗零食嘅店舖就爆料獲邀贊助，仲笑稱「我哋嘅食物似乎太好食」，不過考慮過食品硬度只啱狗狗食後，只能「含！淚！婉！拒！」。
賣狗零食嘅「曲奇咖啡室」fb專頁貼出一篇道歉啟事，內容話有大專生稱讚佢哋嘢食相好睇，想搵佢哋贊助就職典禮，提供食品畀來賓食。佢哋話一直以嚟都有唔少人問「可唔可以畀人食」，都會答「係天然材料，風乾後會好硬朗，但人都應該食得嘅」，但對被邀請贊助人食就表示「超級震驚」，話雖然好想幫大專生，但硬度只啱狗狗食就只好拒絕。

網民：IT狗就職典禮？

有逾1,000個網民係呢個帖留言，好多人話睇完真係笑死，當中有人話，既然佢哋咁受歡迎，不如出埋畀人食嘅曲奇，不過亦有網民留言搞笑同相當抵死，有人話「可能老懵董，689，777，同成班正苦焗腸係嘉賓……」，「可能係請港共官員做嘉賓喎」，亦有人問係咪「IT狗就職典禮」，不過亦有人質疑件事嘅真偽，話成件事「膠味濃」。

李八方