細路豪好鍾意玩數獨，日日揸住張《蘋果日報》填格仔，佢話三個蘋果以下嘅Sudoku一啲都難唔倒佢，玩得多，腦筋都轉得快啲咁話，佢啲算術好有進步㖭，可惜中文仍然差些少，左丁山叫佢日日睇《黃金冒險號》，細路豪話：「好深，睇唔明，睇左丁山重好。」弊，睇左丁山，中文唔會進步，於是叫佢父母強迫細路豪日日睇陶傑，睇多啲中文文選。台灣經濟學家熊秉元要兒子打好中文根基，要兒子每個禮拜背一篇《古文觀止》文章，採用蘿蔔（獎賞）與棒子（懲罰）政策，迫個仔讀背，獎就係背完一篇有錢畀，好似係代為儲蓄去買一件心頭好，罰就係背唔出嘅話，喺客廳罰企十分鐘。熊教授呢個方法好有效啫，讀到中三，熊公子已經識背五十篇古文，出口成章。

台灣孩子或者聽話啲，香港嘅孩子未必得，好似細路豪咁，鬧佢固然笑，罰企又笑，阿媽打佢又笑，只有唔畀佢食，佢先至會苦起塊面，問你點搞；只有引誘之，令佢自動投入，好似玩Sudoku咁。諗諗吓，《蘋果》既然已有遊戲版，篇幅咁大，想吓辦法引誘細路對中文發生興趣得唔得呀？細路睇《蘋果》睇上癮，學好中文、算術，家長就唔會話冇即食麵送，就唔買一份《蘋果》啦。益智遊戲可以鞏固中產讀者基礎，提升廣告商重視嘅Readers'Profile，廣告費都可以企硬好多！
分級燈謎，唔好話老套，可以增加學生對中文學習嘅興趣及發揮想像力。今年年初見到幾個燈謎，一個「蘋果」嘅燈謎係：（一）避雷針，猜國家名；（二）推土機，猜亞洲某國首都名；（三）唐朝玉璽，猜一局長高官名。答案係：（一）緬甸；（二）平壤；（三）李國章。
一個半「蘋果」猜謎：上海人想屋企（諧音格），猜美國一個州份，答案係阿拉斯加。兩個「蘋果」猜謎：（一）春秋有戰事，冬天欠太平，猜中國地名。答案：寧夏；（二）白日依山盡，猜中國地名。答案：（a）西藏、（b）洛陽。細路豪聽完都話好玩，叫左丁山畀多啲燈謎佢估。