肥龍許仕仁潛水有術，無論出席乜嘢公開活動，都自我封嘴，咁做既搶唔到老細煲呔鏡，同時亦永冇講錯嘢。當然有人話，時辰未到啫，到推出政改方案，佢可能日日見報。
總之有個煲呔咁勤力又咁鍾意曝光嘅老頂，班馬梗係冇一個敢偷懶。八方聽聞，肥龍最近同人講，份工認真唔易捱，壓力大，瓣數多，做財政司司長就簡單得多。唔知佢係咪悔恨當年冇答應老董做財司。
肥龍雖然少咳咗，但係仍然精神不足，皆因唔多夠瞓。咁煲呔朝朝八點幾開早禱會，個個司局長都要八點前返到辦公室做功課，一般要六點幾起身，有得早瞓就話早起啫，但係做特區高官，邊有可能一早上床？
肥龍現時全力搞政改，策略係乜都預先張揚，等大家有心理準備，唔會有好大反彈。有知情人士同八方講，煲呔的確想諗方法栽培從政人才，不過肯定唔係首要工作，首先都係要搞掂○七、○八選舉；第二步就搞區議會檢討；然後先至搞政務助理呢類新鮮事物。
香港政治體制四不像，搞代議政制北京唔高興，唔搞香港人又唔開心；香港人要直選特首，北京又驚得要命，真係唔知點做先啱，所以肥龍左右做人難，好彩煲呔有阿爺照住，命令港澳辦同中聯辦同佢搞掂民建聯同自由黨，等佢坐享其成。至於民主派就等煲呔同班馬自己去擺平。

大想頭取消高官問責制

香港咁細，何來政治人才？肥龍上場冇耐，就成日同人呻，話唔知邊個教老董搞高官問責制，呢味嘢《基本法》冇規定要做，而且北京廖暉都唔多贊成，結果搞出個大頭佛。
公務員當然想撥亂反正，其中一個大想頭係恢復舊貌，即係取消高官問責制，由番公務員做司局長，咪一了百了，有啲舊高官更加話呢個可能係香港政局唯一出路。阿董都會腳痛下台，呢個世界其實乜都有可能，反正目前任何改動都要等到○七年啦。肥龍同煲呔都係政務主任AO出身，對外人一定有戒心，更何況老董教訓在前，就算搵到阿松呢類「高班之人」，都不外如是，而且唔易搵㖭。
田少可能太早睇到班公務員想復辟兼奪權，所以年初好勇咁走出嚟代表財團喝停，可惜為時已晚，阿爺痛定思痛，寧願信幹部唔信太子黨，田少最後重落得被人迫宮收場。
八方聽聞，中央已經下令，民建聯內部如果有人唔支持政改，都一樣要郁，以免影響政府威信，所以話曾鈺成都要跟大隊支持政改，否則會同田少一樣命運。

傳真︰2623-9278
電郵︰[email protected]