今日同大家講四個英文字。第一個係「No」字。個No字點解？如果你禮拜四前問我，八方實話你黐線㗎，咁都問？不過你今日問，八方一定唔識答，古德明都未必識答。事實你點解釋呢個字，影響過千億財富分配，絕對唔講得笑。

官方紀錄解說

言歸正傳。前日長實集團開業績記者會，有記者問李嘉誠有冇諗過再婚？超人嘅答案就係呢個「No」字。咁八方嘅解釋就梗係「冇諗過」，或者「唔會再婚」，都唔使查字典啦。不過，噚日拜讀《明報》，原來佢哋位記者在李超人吐出呢個一字千鈞嘅答案之後，向長實公關跟進查問，得出另一個解釋。嗱，佢哋咁寫噃：
「長實公關其後解釋，李嘉誠於再婚問題上答『No』的意思，是指，『不會回答私人問題』，不代表『會』或『不會』再婚。」
哦，原來個No字「官方解釋」只係唔答你咁解。呢個公關真係高手，仲叻過人大，是關咁樣一解釋，超人日後無論婚或不婚，都唔會俾人抽後腳話佢講大話，亦可以多啲空間迴旋，唔使阿小姐同阿少爺馬上大發老脾。至於長實之後發畀傳媒嘅採訪紀錄上，刪去老細談再婚呢一節，就足證佢哋深思熟慮，唔係隨口噏。

講完個「No」字，再講另外三個字，就係「Changemymind」。呢三個字已經成為全城最熱爆嘅口頭禪，八方噚日由中環到將軍澳，不時聽到啲麻甩佬互相問候，唔係問「食咗飯未」，而係問「Change咗mymind」未。
大概佢哋見到首富、爵士、電飯煲大王、諾獎得主、傳媒大亨個個都咁老當益壯，人不風流枉老年，於是都想Changemymind，搵番個N除2加7，譜一段黃昏戀曲。（N除2加7係一條方程式，話男人最宜娶一位自己年齡除2加7歲嘅靚女，咁首富七十八，除2加7，即四十六，阿小姐四十五歲，好啱噃。）
吹完英文水，都要爆少少料畀各位知嘅；根據高人嘅消息話，李超人今年無論No婚還是再婚，都一定家有大喜事。乜嘢？就係抱孫——係孫、唔係女孫。恭喜、恭喜。

傳真︰2623-9278
電郵︰[email protected]