巴黎聖日耳門（PSG）禮拜日憑對手兩度擺烏龍以2:0擊敗里昂嘅法甲聯賽，發生尼馬同卡雲尼爭射12碼嘅風波，有傳媒即刻翻尼馬舊賬，原來佢2010年效力緊巴甲山度士嗰陣都試過爭射12碼，爭輸咗之後比賽態度仲要好差，搞到處罰佢嘅教練最終畀球隊炒咗。

根據西班牙《馬卡報》報道，2010年得18歲嘅尼馬踢緊山度士，佢喺一場對嘅戈亞尼恩斯嘅比賽博到12碼，原本佢拎住個波諗住自己主射，點知教練杜利禾祖利亞（Dorival Junior）唔准佢射，要由其他球員主射，尼馬於是掉低個波，好唔開心咁走開咗，而喺再次上場比賽之後，尼馬一拎到波就自己一個係咁舞……其實，尼馬冇得射12碼之後喺場對教練表現不滿，據報道佢返到更衣室之後都向教練杜利禾祖利亞作出侮辱。

結果呢，山度士對尼馬作出處分，扣咗佢嗰個月嘅30%人工，尼馬亦冇份踢下一場對瓜蘭尼嘅比賽。跟住對哥連泰斯嘅比賽杜利禾祖利亞堅持繼續唔畀尼馬上陣，山度士就終於炒咗呢位教練喇！杜利禾祖利亞其後接受訪問嘅時候咁講「我嘅良心話畀我知，我罰尼馬唔係為咗要開心，而係有必要咁做。」