韓國女星黃靜茵產後復出，夥拍南宮珉拍攝嘅SBS新劇《訓南正音》收視卻未如理想，噚晚播出嘅第9、10集更跌到得3.2%及3.9%，創劇集收視新低。黃靜茵、南宮珉、崔泰俊、吳允兒四名主演今日出席記者會，正面回應網民對劇集嘅評價。

黃靜茵坦言自己會睇網民嘅留言，表示：「可能因為拍太多種類相似嘅劇集，所以演起上嚟令人覺得每個角色都好相似，對於呢點我要負起相應嘅責任，希望大家繼續關注，之後會發現柳正音(劇中角色)唔同嘅魅力。」對於劇集收視成績低，黃靜茵承認劇集一開始發展較慢，但之後劇情就會慢慢推進，亦會交代好多嘢，對劇集嘅收視率有信心。

黃靜茵喺會上亦大方提到私人事，表示婚後、誕B後有好大變化：「本來我已經係一個思想正面嘅人，依家變得更加正面。拍拖時會因為男友覺得世界好美好，生咗囝囝後會因為囝囝而覺得世界好美好。」對於產後修身一事，黃靜茵表示花咗好多心機：「平時會Keep住去按摩，為咗拍劇都加埋做運動，依家體重係103磅，係我理想嘅體重，之後要更努力Keep弗先得。」

更多韓流，喺晒《娛果》
http://fb.com/appledailyent