今日,另一位有份出席撐警大合照的姚瑩瑩就凌晨在facebook出post,以藍底白字留言,寫上:「正義的朋友(心照不宣)揮手區,無限感謝在心中。」,她更貼了數個藍色心心的圖示。睇返當日大合照,她出席撐警時已身穿藍色恤衫身體力行支持,更站在有利位置,企正「Er Er Sir」江永祥及謝Sir隔籬。她的帖文引來4千多個嬲爆的表情公仔,有近4千多個網民留言,不少網民都留言鬧爆她,:「俾嬲唔係因為你藍,係因為你自詡正義。你撐嘅嗰班人除良安暴,今生今世都同『正義』沾唔上邊。」、「咁多留言就知佢今期最紅啦,仲有14億同胞支持,點會係二打六呀,分分鐘央視都再同佢簽約呀」、「正義?咁可否說明2019年7月21日及8月31日,你所支持的警察做緊啲咩?」、「期待下次被警察打嘅係你個仔呀,記住撐到底呀,唔好變心」、「為咗份工,要出賣人格?!」等。
此外,與她合作過的客戶紛紛在FB出聲明割席,王朝滴雞精(香港) Wang Chao於下午一點出post與姚瑩瑩割席,商戶的FB專頁發出聲明:「姚瑩瑩小姐並非本公司之代言人,提供產品試用屬一次性,藝人之言論及立場亦不代表本公司立場,特此聲明。」不少網友到她合作的商戶王朝滴雞精(香港) Wang Chao的FB專頁留言,表示:「支持暴徒的公司,飲完怕肚屙」、「撐警行為猶如支持恐怖分子,根本就係啲唔見得光嘅行為」、「多謝與支持警暴嘅偽人割席」等。