港台《頭條新聞》被迫停播、高層辭職、有線嘅六四報道又被指自我審查，接二連三嘅事件都令人擔憂，香港嘅新聞自由空間係咪收窄？就喺傳媒界風雨飄搖之際，Now新聞部都有人事變動，而且新上場嘅揸FIT人，仲喺業界內引起騷動。

話說Now嘅新聞及財經資訊主管張志剛即將退休，按理當然係副總裁鄭麗矜接替，之不過今日Now就宣佈，由無綫新聞部前高層陳鐵彪「空降」接任。電訊盈科媒體集團董事總經理李凱怡喺通告中話，張志剛今年8月底退休，會委任陳鐵彪接任，佢形容陳鐵彪係資深傳媒人，於印刷媒體開展記者工作，曾經喺亞洲電視及無綫電視新聞部出任不同高級職位超過30年，喺本地、中國同國際新聞都有採訪同管理豐富嘅經驗。

陳鐵彪89年有份去北京採訪六四，當時佢喺亞視新聞部任職，係最後一批離開北京嘅香港記者。一直專責中國新聞嘅佢之後加入無綫新聞部，曾經喺2004年因為精簡人手而自願離職，之後重返無綫，亦曾經擔任新聞行政人員協會嘅執委會成員。

唔少傳媒界中人都知，陳鐵彪同中聯辦關係密切，擔心背後可能又係有中聯辦中手干預任命，以令無綫、有線同Now日後報道嗰陣，可以更加同一陣線。坊間亦估緊陳鐵彪係咪有「整頓」新聞部任務，要壓一壓Now新聞台經常批評政府嘅聲音？

八方都問Now新聞台所屬嘅電盈，陳鐵彪獲任原因及有乜重任？發言人回覆時話，公司喺招聘過程會考慮不同因素，當中包括有關人士嘅新聞及傳播經驗、專業性、及帶領新聞團隊能力等方面，但就無提到係唔係會整頓新聞部，而陳鐵彪就喺下周二（23日）上班。

-----------------------------
反送中一周年，《蘋果》整理大量涉及警察濫暴濫權等資料，製成詳盡資料庫，請按此閱讀圖表版本 ／純文字版本
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
App內1-Click訂閱《蘋果動新聞》
按此了解更多