呢期新股當旺，個個都到實一實，要吸引到市場嘅眼球，梗係要搵啲過人之處，好似友邦（1299）就用三個「第一」同各路新股撼過，皆因佢哋除咗集資額係今年數一數二咁大、又係同行老大之外，聘請投行助陣招股嘅數目係第一，又係第一間企業用粉紅表eIPO，仲分分鐘係新股之中俾大行出報告唱淡嘅時間上排第一！
友邦今次招股請咗11間投行助陣，比起之前農行（1288）嘅7間，仲要多4間，呢班投行嘅佣金都應該幾和味。

里昂質疑前景

佢哋今次上市，雖然優先認購冇客戶份，但係班員工就可以參與，據聞佢哋可以率先透過用eIPO嘅方式自行認購，有別於以前要填張粉紅表，連埋支票交畀人事部嘅做法。呢個方法要畀人事部搞完一輪確認後，先將資料交畀中央證券同埋收款銀行處理，因為程序咁複雜，所以往往要提前一日截飛。有咗呢個eIPO咁慳水慳力嘅方法，班優先認購嘅員工唔使再提早截飛。消息話，太古（019）之前分拆太古地產上市，都打算用呢招，可惜佢哋招股要急煞車，所以畀友邦冷手執埋呢個熱煎堆。
不過友邦公開發售都仲未開波，已經俾冇份負責做單刁嘅里昂唱淡，話想認購友邦嘅投資者，應該下限入飛，而且唔建議增持，對友邦嘅前景質疑，話佢哋市佔率跌緊。但華華認為都唔一定係壞事，近期新股熱辣辣，有啲新聞助吓興，話唔定可以殺出一條血路。
李華華
mailto:[email protected]