已故民主派「三料議員」吳明欽愛女吳思諾去年加入民主黨之後，被安排喺太子參與地區工作，更加參與咗黨內政治領袖培訓計劃，預備出戰下屆立法會選舉。但八方聽聞，吳思諾早前已經退出咗政治領袖培訓計劃，同時表明唔參與區選，吳思諾回覆八方查詢時冇否認，只係話暫時唔想回應。

專心大律師工作

據了解，吳思諾早前向黨申請，因為想專心大律師工作，故此退出培訓計劃，八方問過該黨九西立法會議員黃碧雲，佢承認思諾暫時停止參與培訓計劃，專心應付目前審訊中嘅佔中九子案，同埋社民連梁國雄新東議員資格上訴等。但碧雲亦都話，只要思諾有時間，隨時可以再加入計劃，亦都唔一定要參與計劃先可以喺未來代表民主黨參選，同時要考慮其他因素㗎。

除咗吳思諾，據知亦有多名白鴿黨員有參與黨內嘅政治領袖培訓計劃，包括前副主席兼沙田區議員李永成、深水埗區議員袁海文，同埋反圍標大聯盟嘅莊榮輝等。據黨內評估，袁海文嘅得分最高，至於思諾嘅得分中等，黨內早前要求佢同其他人各交一份半年計劃，畀黨內選舉委員會再檢討。