陳法拉、陳靜（DaDa）同埋喺內地拍《爸爸去哪兒》而爆紅嘅人氣男模張亮等，今日喺又一城出席「STACCATO2014春夏FashionDay&Night」時裝騷，莊思敏同連詩雅都有份行。

不過，法拉同DaDa，著條裙又比較短啦，又要坐低喎，咁就....嘩!!一白一黑，好光呀啲春光！下次真係要再小心啲先得。

之前香港落雹又黑雨，搞到又一城變咗「水舞間」，今日個品牌要喺又一城搞活動，但就因為唔喺漏水嗰邊，所以活動可以順利舉行。法拉話之前都好驚，第一時間問同事會唔會取消，初初以為係俾冰雹整爛，原來係去水渠問題，維修咗已經冇事。法拉話：「見到已經回復正常，效率都好高。」

法拉話當晚喺屋企唔敢出街，自己都有睇過啲片，都幾驚，因為未試過咁，佢仲笑道：「我都睇到個男仔喺地下玩水，但嗰啲原來係污水，唔係雨水。」

法拉又話今次第一次見張亮，覺得佢真人好高：「佢好nice，我都有睇佢節目，個節目好犀利，希望香港都有多啲呢啲節目。」問法拉依家係咪北上神州？佢話：「係展望地球，希望周圍去到，唔只邊個地區，做演員冇限制。」講到電影版《衝上雲霄》會唔會接？法拉話要睇檔期，演員有時要睇天時地利，夾到先得。