「超級碗」（Super Bowl）一向係美式足球嘅盛事，當中嘅半場表演都屬世界矚目，例如啱啱過去嘅年度就由Lady GaGa於場中又唱又跳，更一度引發網絡瘋傳。至於邊個會做下年表演嘉賓？最近竟然傳出剛嚟過香港開騷嘅Britney Spears，以佢今時今日已大不如前嘅名氣，同埋咪嘴傳聞，相信好多人都嚇一跳！

「超級碗」半場表演係美國其中一個最大型同重要嘅騷，過往咁多年都由超級紅星負責，除咗啱啱呢年嘅Lady GaGa，過去呢幾年就有Coldplay、Beyonce、Katy Perry同Bruno Mars等等。近來就有傳Britney嘅團隊已經同有關方面開緊會，傾關於2018年嘅半場表演，相比起以上幾個單位，近年Britney嘅名氣確實差得遠喎。《紐約每日新聞》就報導：「Britney覺得可以喺超級碗表演係夢想成真，佢有晒所需條件，可以登上頭條。」其實2001年佢都同Aerosmith於超級碗表演過，而上年佢接受訪問，都話好想再表演多次。唔知有關方面肯唔肯呢？2018年超級碗將於2月4號舉行。