證監會叉人成日都見,不過亨達集團主席鄧予立竟然夠膽叉番證監轉頭,就真係好夠薑!佢噚日特登喺報紙登聲明,話唔排除透過法律途徑追究。
話說舊年6月,證監會出咗篇執法新聞稿,就亨達集團三位經營無牌槓桿式外滙交易業務嘅職員,作出紀律處分,其中一位叫吳肖梅,即係鄧予立老婆;另外兩位係羅啟義同埋鄧婉婷。
證監衰就衰在喺新聞稿上面寫:「證監會發現:羅與鄧為亨達的負責人員,吳則是亨達集團主席的妻子。」令鄧予立好唔滿意,認為文中提到嘅「鄧」,好似講到佢本人涉及事件,事關證監處分嘅鄧婉婷,只係經紀仔,未去到負責人咁高級。鄧主席話佢曾經多次向證監提出,要求對方更正並公開澄清,證監唔肯,只肯認打錯字。鄧予立仲話,其後證監喺冇知會公眾嘅情況下,改咗份執法新聞稿。華華上網睇番,呢份稿已改為「羅及吳是亨達的負責人員」,更新日期係今年5月18日。