近幾年無心戀戰於上市公司的朱新禮，終於把自己的私人持有的上游濃縮果汁業務（簡稱佢叫A公司），注入滙源（1886）。海迪個人認為，呢單deal簡直就當其他股東係傻仔。
滙源總共用了49億港元買入A公司，15億是用承擔債務的方式支付，34億是發新股及可換股債（CB）。表面上朱新禮無收現金，但早在交易之先，朱新禮就進行了資產重組，A公司喺香港借咗15億元貸款幫朱新禮買嘢，然後呢15億債務就透過今次交易，過咗俾滙源「啃」。

滙源去年底總負債高達37.6億（人仔．下同），當中18億係1年內要還的銀行貸款。但滙源舊年經營現金流入只得1.43億，一年要俾的利息就已經達2.31億，仲多過公司該年盈利，如果唔係有2.5億政府補貼，滙源有無錢賺，都成問題。咁嘅財政狀況，滙源仲要舉債向朱新禮買嘢，當中的邏輯，睇怕朱新禮自己先明。
A公司截去年底止，資產淨值只有8.57億。滙源向市場不斷強調，收購後滙源舊年整體的EBITDA（除息、稅項、折舊及攤銷前盈利），可由6億增至9.5億，對滙源盈利有莫大裨益。海迪唔懷疑呢個盈利的可靠性，不過海迪想提醒各位，EBITDA是未計入公司每年要支付的龐大利息支出。另外，今次收購滙源要狂發新股及CB，已佔公司現時發行股本75%。又攤薄又貴，你要埋我份啦。

海迪