韓國男團BIGBANG近期非常忙碌，又要忙住舉行巡迴粉絲見面會，又要準備下月推出嘅新碟，而五子早前更為新碟轉新look，當中G-DRAGON（GD）、T.O.P及大成分別以黃色、粉紅色及藍黑色新髮色示人，被粉絲笑指似美少女戰士。

BIGBANG噚日及今日都於福岡舉行見面會，以新look會粉絲，當中GD個又黃又綠嘅新髮色非常搶眼，連佢自己都笑言：「好似菠蘿。」而換咗粉紅色髮色嘅T.O.P就話自己似士多啤梨，咁藍黑色髮色嘅大成係唔係藍莓？而勝利同太陽都係啡色髮，相比之下感覺好保守。

不過粉絲就唔覺得GD、T.O.P及大成嘅新髮色似水果，反而覺得好似美少女戰士合體，仲製作拼圖放上Instagram，非常搞笑。