新年特別多酒會、團拜，一時之間都冇法子去得晒，只能夠揀一啲時間方便到自己嘅團拜先至去。呢日去一個大型團拜會，會場人頭湧湧，本來想握完手，兜個圈就鬆人，但幾位老友話特首雖然遲到，但一定會到，叫左丁山等一等，唔好咁冇禮貌。於是一等就等多二十分鐘，其間聽到兩位人客嘅談話。

A：「乜誰YY，最近俾人質疑噃，你知唔知？」
B：「當然聽到啦，聽講佢啲學歷哥厘有啲問題，未必係真嘅噃？」
A：「唉吔，佢間大學冇人識㗎，好易搞掂㗎咋！」
B：「××其實應該審查嚴格啲，選呢啲人做會員，我哋係會員都覺得丟架啦。」
講到呢度，主人家與特首上台，AB兩人唔再講嘢，佢兩位喺大庭廣眾之中講另一位YY，講到實牙實齒，相信唔會花假，而且呢兩位係十大××會員，點會唱衰自己個會？講開又講，左丁山識得唔少××會員，個個都係真材實料之輩，但唔知點解，呢個會久唔久有幾個俾傳媒踢爆，搞到聲名狼藉嘅，唔通啲遴選小組委員經常瞌眼瞓？
做個老老實實嘅好人，為社會貢獻，都可以做××嘅，毋須為學位之事塗脂抹粉，好多醒目仔女就係過唔到呢個虛榮關，可惜也。