飛馬前鋒陳肇麒噚日證實，舊會南華喺轉會條款寫明唔可以倒戈，所以月中冇得喺港超聯調轉槍頭，惹嚟熱烈討論。不過，睇完周五德甲利華古遜大方到畀借將上陣，點知就俾柏柏杜普路斯（Papa）一箭定江山，作客輸畀漢堡0:1，唔通為成績真係要去盡啲？

利華呢場波缺少俾國際足協判四個月停賽令嘅土耳其中場查漢奴古，即刻死晒火，全場射門竟然零中框，反觀漢堡矢志護級勝在夠搏命，76分鐘終於靠Papa接應尼高拉梅拿傳中頂入，幫漢堡攞到救命三分，暫時以19戰16分升上尾三，利華就繼續排第九。Papa上半季外借RB萊比錫，但受傷患困擾下出場機會唔多，結果轉借漢堡幫手救火，呢位希臘守將話：「呢個只係開始。我哋要繼續努力，而家唔應該慶祝。」