民建聯選舉贏得最多議席，但就輸咗個蔡菜子；泛民力保關鍵23席，不過總得票數就大倒退，兩大陣營邊個係贏家真係好難講，自由黨更唔使提，直選慘遭「剝光豬」，田少無奈「裸退」，左計右計，八方認為今屆選舉大贏家唔係政黨，而係中文大學。

此話何解？事關十幾個立會新丁中，最少五個係中大畢業生，其中醫學界梁家騮最犀利，創造歷史，打破醫學界議席由港大醫學院畢業生壟斷多年局面，係首個做醫學界議員嘅中大醫學院舊生，更係首個公立醫院醫生當選呢個位，真係前無古人。
人稱騮哥嘅梁家騮噚日返回威爾斯親王醫院謝票，中大醫學院院長霍泰輝向佢握手道賀，在場人士稱，騮哥去到飯堂時，全場人士鼓掌迎接騮哥凱旋而歸，場面都頗轟動咁話。因歷史原因，香港醫學界向來由「對面海」（呢個顯然係中大醫學院中人觀點）班人當道，騮哥成功衝出馬料水，由吐露港去到維多利亞港殺入立法會，難怪受到英雄式歡迎。
騮哥86年中大醫學院畢業，係首屆畢業生，唔少師弟對大師兄做議員都幾興奮，有人話今鋪真係吐氣揚眉，因為今次選舉，四個候選人中，三個係港大畢業生，三人各有後台、優勢，騮哥以一敵三都贏，可謂技術性擊倒港大。
除咗梁家騮，會計界陳茂波、資訊科技界譚偉豪、民建聯陳克勤同鼠王芬梁美芬都係中大畢業生，而勞工界工聯會潘珮璆醫生，雖然係港大醫學院出品，但𠵱家係中大醫學院榮譽副教授，都算係中大人。
現任立法會議員中，仍然以港大舊生佔多數，「中大幫」除咗上述幾人，仲有教育界張文光，至於其他幾間大學，由於種種原因，相信可見將來追唔上，好似科大咁，創立不足20年，又點同百年老店港大、或者有45年歷史嘅中大比較呢？民建聯李慧琼係科大工商管理學士，應該係首個晉身立法會科大舊生。
至於其他新丁，社民連黃毓民係珠海出品，佢高票當選，學弟、舊生應該與有榮焉，至於甘乃威，佢最近報讀浸大公共行政管理碩士，如無意外，任期屆滿前應該可以畢業。

mailto:[email protected]